सोलुखुम्बु । सोलुखुम्बुमा आगलागीमा परी एक जनाको मृत्यु भएको छ । सोलुदूधकुण्ड नगरपालिका–२ थुम्लिङमा बुधबार राति भएको आगलागीमा  ४० वर्षे नवराज खालिङ राईको मृत्यु भएको हो । 

बलबहादुर नेवारको  घाँस राख्ने गोठमा आगलागी हुँदा खालिङको ज्यान गएको  वडासदस्य हीराकाजी श्रेष्ठले जानकारी दिनुभएको छ । खालिङ १५ वर्षदेखि बेवारिसे अवस्थामा बस्दै आएका थिए । बिहीबार राति त्यही गोठमा बसेका खालिङले चुरोट खाने क्रममा आगलागी भएको अनुमान गरिएको सोलुखुम्बुका प्रमुख जिल्ला अधिकारी अनोजकुमार घिमिरेले जानकारी दिनुभयो । 

घटनाबारे थप अनुसन्धानका लागि बिहान प्रमुख जिल्ला अधिकारी घिमिरे, प्रहरी नायब उपरीक्षक द्वारिकाप्रसाद घिमिरे र चिकित्सकसहितको टोली घटनास्थल पुगेको छ । आगलागीबाट जलेर चिन्न नसक्ने अवस्थामा रहेका खालिङको शव परीक्षणका लागि जिल्ला अस्पताल फाप्लु ल्याइएको प्रजिअ घिमिरेले बताउनुभयो ।