काठमाडौँ । छिमेकी मुलुक भारतको राजधानी नयाँदिल्लीमा कुहिरोका कारण हवाई तथा रेल सेवा प्रभावित भएको छ ।  लगातार चिसो र कुहिरोको कारण दृश्यतामा कमी आएकाले बुधवार दिल्लीको इन्दिरा गान्धी अन्तर्राष्ट्रिय (आईजीआई)  विमानस्थलका लागि हुने १ सय २०  उडान प्रभावित भएका हु्न् । 

कुहिरो र अन्य परिचालन समस्याका कारण बुधबार ५३ उडान रद्द गरिएको घोषणा गरिएको थियो । ‘दिल्ली एयरपोर्ट फ्लाइट इन्फर्मेसन डिस्प्ले सिस्टम (एफआइडिएस) को तथ्याङ्कअनुसार  १ सय २०  प्रभावित उडानमा ४४ अन्तर्राष्ट्रिय ७६  आन्तरिक रहेका छन् ।  बुधबार बिहान ८ बजे एफआइडिएसको तथ्याङ्कअनुसार १ सय २० उडान प्रभावित भएका साथै कुहिरो र अन्य कारणहरूले गर्दा कूल ५३ उडान रद्द गरिएको छ ।  रद्ध गरिएका उडानमा ३७  आन्तरिक र १५ वटा अन्तर्राष्ट्रिय उडानहरू रहेका छन् । 

त्यस्तै दिल्ली जाने करिब २० वटा यात्रुवाहक रेल निर्धारित समयभन्दा ढिलो मात्र सञ्चालन भएका छन् ।  भारतीय मौसम विज्ञान विभाग (आईएमडी) को तथ्याङ्कअनुसार बुधबार बिहान ५ः३० बजे पन्जाब, हरियाणा, दिल्ली, पश्चिम राजस्थान, पश्चिम र पूर्वी उत्तर प्रदेशसहित देशका विभिन्न भागमा दृश्यता दुई सय मिटरभन्दा कम रेकर्ड गरिएको छ ।

आईएमडीका अनुसार बुधबार बिहान दिल्ली, पूर्वी राजस्थान, पूर्वी उत्तर प्रदेश , बिहार, पश्चिम बङ्गाल , अरुणाचल प्रदेश  र असमका छुट्टिएका क्षेत्रहरूमा घना कुहिरो देखिएको छ ।