काठमाडौँ । ललितपुरको बालकुमारी घटनामा आफूलाई दोष देखाएपछि  भौतिक पूर्वाधार तथा यातायातमन्त्री प्रकाश ज्वालाले असन्तुष्टि जनाउनुभएको छ । 

बालकुमारीमा गएको शुक्रबार राज्यको दमनमा २ युवाले जीवन गुमाएपछि गृहमन्त्री र प्रहरी प्रमुखले पूर्वाधारमन्त्री  ज्वालालाई दोष लगाउनुभएको थियो ।  राज्य व्यवस्था तथा सुशासन समितिमा सोमबार भएको छलफलमा उपप्रधानमन्त्री तथा गृहमन्त्री नारायणकाजी श्रेष्ठ र र प्रहरी प्रमुख बसन्त कुँवरले पूर्वाधारमन्त्रीको गाडी नपुगेको भए परिस्थिति त्यस्तो नहुने भन्ने धारणा व्यक्त गर्नुभएको थियो ।  पूर्वाधारमन्त्री  ज्वालाले  प्रधानमन्त्रीलाई भेटेर गृहमन्त्री र प्रहरी प्रमुखको त्यो भनाईप्रति असन्तुष्टि जनाउनुभएको हो । 

घटनामा गृहमन्त्री र प्रहरी प्रमुखले आफूलाई दोष लगाएपछि पूर्वाधारमन्त्री  ज्वाला त्यसको भोलिपल्ट मंगलबार बिहान आफ्नो नेकपा पार्टी एकीकृत समाजवादीका अध्यक्ष माधवुकमार नेपाललाई लिएर प्रधानमन्त्री पुष्पकमल दाहाल प्रचण्डलाई भेट्न बालुवाटार पुग्नुभएको थियो । 

गृहमन्त्रीले दोषजति आफूतिर सोझ्याएर घटनामा आफू चोखिन खोजेको पूर्वाधारमन्त्री  ज्वालाको गुनासो छ ।  ईपीएस कोरिया शाखाका कारण विवाद उत्पन्न भएको र सुरक्षा व्यवस्थामा भएको कमजोरीका कारण दुर्घटना हुन पुगेको मन्त्री ज्वालाको बुझाई छ । 

बालुवाटार स्रोतका अनुसार प्रधानमन्त्रीसँगको भेटमा पूर्वाधारमन्त्री  ज्वालाले  ‘ईपीएसका कारण समस्या उत्पन्न भयो, दुई पक्षको झडप मसँग जोडिंदैन ।  त्यहाँको परिस्थिति थाहा नभएर हाम्रो गाडी बाटोमा आयो ’ भन्नुभएको थियो ।