काठमाडौँ । गोकर्णेश्वर नगरपालिकामा महिलाको हत्या भएको छ । महिलाको हत्या गरेको हुन सक्ने आशंकामा  २ जना पक्राउ परेका छन् । 

गोकर्णेश्वर नगरपालिका १, सुन्दरीजलमा  मजदूरी गरेर गुजारा चलाउँदै आएकी सिरहाकी राम दुलारीको हत्या भएको हो । उनको शव बिहीबार सुन्दरीजलस्थित ढुंगाको चेपभित्र शंकास्पद भेटिएको थियो । त्यसको आधारमा अनुसन्धान गर्ने क्रममा प्रहरीले २ द्दजनालाई पक्राउ गरेको हो । 

हत्यामा संलग्न हुन सक्ने आशंकामा सर्लाहीका ४० वर्षीया रामविनय महरा र २४ वर्षीया सन्तोष राम महरालाई पक्राउ गरिएको जिल्ला प्रहरी परिसर, काठमाडौंका एसपी नवराज अधिकारीले जानकारी दिनुभएको छ । 

‘शुरुमा नामसहितका विवरण नखुलेपनि प्राविधिक पक्ष र मानवीय सूचनाको विश्लेषण गरेर अनुसन्धान गर्दै जाँदा संलग्न व्यक्तिहरु शनिबार बसुन्धारा क्षेत्रबाट पक्राउ परेका हुन्’  एसपी अधिकारीले भन्नुभयो  ‘ मृतक सिरहाकी राम दुलारी भएको भन्ने बुझिएको छ ।’

एसपी अधिकारीका अनुसार मृतकका आफन्त भने  अहिलेसम्म सम्पर्कमा आएका छैनन् । प्रारम्भिक जाँचका आधारमा हत्याको कारण प्रेम सम्बन्ध हुनसक्ने प्रहरीले आशंका गरेको छ ।