उदयपुर । उदयपुरको मध्यपहाडी क्षेत्र रौतामाई गाउँपालिका–३ भोर्लेनीमा आगलागीबाट तीन घर जलेको छ । नवउदय सामुदायिक वनमा शनिबार लागेको आगो फैलिएर भोर्लेनी गाउँमा  तीन घर र तीन गोठ जलेको हो । 

उदयपुर प्रहरीका अनुसार शनिबार नवउदय सामुदायिक वनमा लागेको आगो नजिकैको गाउँमा हावाहुरीले ल्याएपछि भोर्लेनीका गाउन राई, मनकुमारी राई, जगतबहादुर राई, मदन राई, गोविन्द नेपाली र रामबहादुर राईको ३ घर र ३ गोठ जलेको छ ।
              
आगलागीका कारण घरमा भएका सबै अन्न, लत्ताकपडा र नगदसहित सुनचाँदी सबै जलेर नष्ट भएको प्रहरी नायव उपरीक्षक हरिनन्दन चौधरीले जानकारी दिनुभएको छ । उहाँका अनुसार आगलागीबाट करिब ४६ लाख रुपैयाँ बराबरको क्षति भएको प्रारम्भिक अनुमान गरिएको छ ।

सामुदायिक वनको आगो गाउँमा प्रवेश गरेपछि प्रहरीको टोली र स्थानीयवासी मिलेर शनिबार रातिसम्ममा आगो निभाइएको प्रनाउ चौधरीले बताउनुभयो ।