काठमाडौँ ।  सघन शहरी तथा भवन निर्माण कार्यालय राजविराजका तत्कालीन आयोजना प्रमुख सचिन्द्रकुमार देवसहित ५ विरुद्ध भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले  आयोजना प्रमुख देवसहित इन्जिनियर मदन राय, सवइन्जिनियर सरोजकुमार यादव लगायतविरुद्ध मंगलबार विशेष अदालतमा मुद्दा दायर गरेको हो ।

राजविराज मधुवापुर वडा कार्यालयबाट अर्जी टोलसम्मको तीन सय मिटर सडक कालोपत्र गर्ने क्रममा प्रक्रिया नपुर्याइ काम गरेकाले उनीहरुविरुद्ध मुद्दा दायर गरिएको आयोगका प्रवक्ता नरहरि घिमिरेले जानकारी दिनुभएको छ ।

अख्तियारले आयोजना  देव, इन्जिनियर राय, सवइन्जिनियर यादवविरुद्ध ३ लाख ४७ हजार रुपैयाँ बराबरको बिगो दाबी  गरेको छ । प्रकरणमा गुन्जा कन्सट्रक्सन, खडक नगरपालिका–८ सप्तरीका प्रोपाइटर गोविन्दप्रसाद मण्डलविरुद्ध पनि ३ लाख ४७ हजार बिगो दाबी गर्दै मुद्दा दायर गरिएको छ ।