काठमाडौँ । पूर्वप्रधानमन्त्री तथा एमाले अध्यक्ष केपी शर्मा ओलीले नेकपा एकीकृत समाजवादी पनि नयाँ गठबन्धनमा ल्याउने बताउनुभएको छ । एमाले अध्यक्ष ओलीले पूर्वप्रधानमन्त्री तथा एकीकृत समाजवादीका अध्यक्ष माधवकुमार नेपाललाई फोन गरेर त्यस्तो जानकारी गराउनुभएको हो । 

एमाले अध्यक्ष ओलीले अस्वस्थताले केही दिनयता कोटेश्वर निवासमा आराम गरिरहनुभएका समाजवादी अध्यक्ष नेपाललाई आइतबार साँझ फोन गरेर स्वास्थ्य लाभको कामना गर्दै त्यस्तो प्रस्ताव राख्नुभएको हो । राजनीतिक दौडधुप र धपेडीले अस्वस्थ बन्नुभएका अध्यक्ष नेपाललाई भेट्न उहाँको निवास कोटेश्वरमा सोमबार साँझ प्रधानमन्त्री पुष्पकमल दाहाल र उपप्रधानमन्त्री तथा गृहमन्त्री नारायणकाजी श्रेष्ठ पुग्नुभएको थियो । प्रधानमन्त्री दाहाल अध्यक्ष नेपाललाई भेट्न जानुअघि ओलीले बालुवाटारबाटै उहाँलाई टेलिफोन गर्नुभएको हो । 

ओलीले अध्यक्ष नेपाललाई टेलिफोनबाट  ‘स्वास्थ्यलाभको कामना छ । म बाहिर जानुपर्ने भएकाले तपाईंलाई भेट्न आउन सकिनँ । प्रधानमन्त्रीजी त्यहाँ आउँदै हुनुहुन्छ । तपाईंसँग प्रधानमन्त्रीले ल्याउनुहुने कुरा मेरो पनि हो, गठबन्धनमा तपाइँ पनि आउनुपर्छ’ भन्नुभएको त्यसबेला प्रधानमन्त्री निवासमै रहनुभएका नेकपा माओवादी केन्द्रका उपमहासचिव वर्षमान पुनले जानकारी गराउनुभएको छ ।