काठमाडौँ । राजधानीमा जारी त्रिकोणात्मक टी-२० श्रृंखलाको फाइनलमा नेपाल र नेदरल्यान्ड्सबीच प्रतिस्पर्धा हुने पक्का भएको छ । आज नामिबिया र नेदरल्यान्ड्सबीचको खेल बर्षाका कारण रद्द भएपछि फाइनलमा नेपाल र नेदरल्यान्ड्सबीच प्रतिस्पर्धा हुने पक्का भएको हो । 

आजको खेल बर्षाका कारण रद्द भएपछि नामिबिया र नेदरल्यान्ड्सले १–१ अंक बाँडे । नामिबियासँग अंक बाँडेपछि नेदरल्यान्ड्स ५ अंकसहित शीर्षस्थानमा रहँदै फाइनलमा पुगेको छ । दोस्रो स्थानमा रहेको नेपालको ४ अंक छ भने नामिबियाको ३ अंक मात्र भयो ।

त्रिवि क्रिकेट मैदानमा आइतबार नेदरल्याण्ड्सविरुद्ध टस हारेर पहिला ब्याटिङको निम्तो पाएको नामिबिया १५ ओभरमा ९८–४ को अवस्थामा खेलिरहेको थियो । तर वर्षाको कारण खेल अवरुद्ध भएपछि दुबै टिमले अंक बाँडेका हुन् । 

नेपाल पहिलो खेलमा नामिबियासँग २० रन र दोस्रो खेलमा नेदरल्यान्ड्ससँग २ रनले हारेको थियो । तर आफ्नो तेस्रो खेलमा नामिबियालाई ३ रन र चौथो खेलमा  नेदरल्यान्ड्सलाई ६ विकेटले हराउँदै नेपालले फाइनलमा स्थान पक्का गरेको हो । नेपाल र  नेदरल्यान्ड्सबीचको फाइनल मंगलबार हुनेछ ।