धनुषा । क्षीरेश्वरनाथ नगरपालिकामा आजदेखि मदन भण्डारी प्रथम राष्ट्रिय महिला हक्की प्रतियोगिता हुँदैछ । नगरपालिका वडा नम्बर ५ महेन्द्रनगरस्थित क्षीरेश्वर जनता उच्च माध्यमिक विद्यालयको खेल मैदानमा  महिला हक्की प्रतियोगिता आयोजना गरिएको हो । 

मदन भण्डारी स्पोर्टस् एकेडेमीद्वारा आयोजित प्रतियोगितामा कर्णाली बाहेक अन्य ६ प्रदेश, नेपाली सेना तथा आयोजक मदन भण्डारी स्पोर्टस् एकेडेमीका  ८ टिमका एक सय ४४  खेलाडीको सहभागिता रहने छ ।  एकेडेमीका अध्यक्ष ध्रुव आचार्यका अनुसार प्रतियोगिता फागुन १९ गतेसम्म सञ्चालन हुनेछ । खेलकुदमार्फत् देशको प्रतिष्ठा राष्ट्रिय तथा अन्तर्राष्ट्रियस्तरमा बढाउनका प्रतियोगिता आयोजना हुन लागेको उहाँले बताउनुभयो । 

प्रतियोगितामा प्रथम हुने टिमलाई एक लाख ५० हजार रुपैयाँ र ट्रफि, द्वितीय हुनेलाई ट्रफि सहित  एक लाख र तृतीय हुने टिमलाई ट्रफि सहित  ५० हजार नगद प्रदान गरिने छ । उत्कृष्ट खेलाडीलाई  १० हजार रुपैयाँ  र  प्रतियोगितामा  ५६ लाख १३ हजार खर्च हुने अनुमान रहेको जनाइएको छ ।