काठमाडौँ । प्रमुख प्रतिपक्ष दल नेकपा एमालेको केन्द्रीय कमिटी बैठक भोलि मंगलबार बिहान ११ बजेदेखि पार्टी मुख्यालय च्यासलमा शुरु हुँदैछ । 

फागुन १० गतेसम्म चल्ने केन्द्रीय कमिटी बैठकमा जनपरिचालनदेखि पार्टी शुद्धीकरणसम्म छलफल हुने  प्रचार विभाग प्रमुख राजेन्द्र गौतमलेजानकारी दिनुभएको छ । 

प्रचार विभाग प्रमुख  गौतमका अनुसार  केन्द्रीय कमिटी बैठकमा पेश हुने एजेण्डा सचिवालयमा छलफल गरेर तय भएको छ । ‘‘तत्कालीन राजनीतिक कार्यक्रमदेखि संगठन शुद्धिकरणसम्मका ६ वटा एजेण्डा तय भएको छ’ उहाँले भन्नुभयो । 

गौतमका अनुसार अध्यक्ष केपी शर्मा ओलीले मुलुकको राजनीतिक परिस्थितिबारे जानकारी दिने सम्बोधनलाई बैठकको पहिलो एजेण्डामा राखिएको छ । त्यसबाहेक छलफल हुने एजेण्डा भने महासचिव शंकर पोखरेलले पेश प्रस्तुत गर्नुहुनेछ । 

दोस्रो एजेण्डामा समग्र सांगठानिक कामको समीक्षा, तेस्रोमा संगठन शुद्धीकरण र सुदृढीकरणको अवधारणा, चौथोमा जनआधारित पार्टी निर्माणमा देखिएको समस्या र समाधानबारे छलफल हुने गौतमले जानकारी गराउनुभएको छ । 

.पाँचौं एजेण्डामा जनदबाव र जनपरिचालन सम्बन्धी कार्यक्रममाथि छलफल गरिएको छ । ‘सरकारको कामको समीक्षा, जनताका समस्या र एमालेले निर्वाह गर्नुपर्ने भूमिकालाई हामीले जनदबाव र जनपरिचालनमा राखेर छलफल गर्दैर्छौ’ उहाँले भन्नुभयो । 

बैठकमा एमालेले गएको मंसिरमा सञ्चालन गरेको मध्यपहाडी संकल्प यात्राकोे समीक्षा  समेत हुने भएको छ ।