काठमाडौँ । नेपाल र क्यानडाबीच जारी तीन दिवसीय क्रिकेट श्रृंखलाको तेस्रो तथा अन्तिम खेल भोलि (सोमबार) त्रिवि अन्तराष्ट्रिय क्रिकेट मैदान कीर्तिपुरमा हुदैछ । 

श्रृंखलाको पहिलो खेलमा ७ रन र दोस्रो खेलमा ४ विकेटले जितेर श्रृंखला २ ० ले कब्जा गरेको नेपालले तेस्रो तथा अन्तिम खेलमा पनि जितलाई निरन्तरता दिदै श्रृंखला ‘क्लीनस्वीप’  गर्ने उदेश्यका साथ मैदानमा उत्रर्दैछ । 

आइसिसी विश्वकप क्रिकेट लिग–२ को शृङ्खला शुरु हुनअघि नेपालले र क्यानडाविरुद्ध तयारीस्वरुप तीन खेलको शृङ्खला खेलिरहेको छ ।  

अन्तिम खेलमा अनुभवी तीव्र गतिका बलर सोमपाल कामीलाई विश्राम दिँदै नेपालले हेमन्तलाई डेब्यू दिने सम्भावना छ । हेमन्त पावर प्लेमा नयाँ बलका साथ इनस्विङग बलका लागि चिनिन्छन् । 

क्यानडाविरुद्धको जारी शृङ्खलामा नेपालले तीव्र गतिका बलर आकाश चन्द, रिजन ढकाल र स्पिनर सूर्य तामाङलाई डेब्यू गराइसकेको ।

सूर्य र रिजनलाई पहिलो खेल तथा आकाशलाई दोस्रो खेलमा डेब्यू दिएको थियो ।

नेपाल र क्यानडाबीचको सोमबारको खेल बिहान ९ः१५ बजेबाट शुरु हुनेछ। 

क्यानडा एकदिवसीय शृङ्खला खेल्न पहिलोपटक नेपाल आएको हो। नेपाल र क्यानडाबीच पहिलोपटक एकदिवसीय मान्यताप्राप्त शृङ्खला हुन लागेको हो। २ वर्ष अगाडि नेपालले क्यानडाको भ्रमण गरेको थियो। यद्यपि त्यो समय क्यानडाको एकदिवसीय मान्यता गुमिसकेको थियो। गत वर्ष क्यानडाले पुनः एकदिवसीय मान्यता प्राप्त गरेको थियो ।