काठमाडौँ । पूर्वमन्त्री तथा नेकपा एमालेका सांसद वसन्तकुमार नेम्बाङको स्वास्थ्यमा क्रमिक रुपमा सुधार भइरहेको छ । 

ललितपुरको नेपाल मेडिसिटी अस्पतालमा उपचाररत उहाँको स्वास्थ्यमा क्रमिक सुधार आइरहेको उहाँका स्वकीय सचिव गणेश योङहाले जानकारी दिनुभएको छ । ‘उहाँ बोल्न खोजे पनि प्रस्ष्टसँग बोल्न सक्नुभएको छैन । उहाँले बोलेका कुनै शब्द मात्र बुझिन्छ’ योङहाले भन्नुभयो – ‘सांसद नेम्बाङको स्वास्थ्यमा क्रमिक सुधार भइरहेको छ ।’

अस्पतालमा सांसद नेम्बाङको फिजियोथेरापी नियमित भइरहेको छ । डा गोपालरमण शर्माको नेतृत्वमा डा बाबुराम पोखरेल, डा प्रसन्ना कार्की लगायतका चिकित्सकको समूहले उहाँको उपचार गरिरहनुभएको छ ।  माघ १७ गते ताप्लेजुङ गएकाबेला उहाँलाई ‘ब्रेन स्ट्रोक’ भएपछि त्यही दिन उपचारका लागि काठमाडौँ ल्याइएको हो । 

एमालेका केन्द्रीय सदस्य समेत रहनुभएका नेम्बाङ पाँचथरबाट प्रतिनिधिसभा सदस्य हुनुहुन्छ ।