काठमाडौँ । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले दुर्गा प्रसाईं हावादारी भएको बताउनुभएको छ । 

माओवादी अध्यक्ष दाहालले आइतबार नेवा राष्ट्रिय मुक्ति मोर्चाको प्रशिक्षणमा विवादित मेडिकल व्यवसायी प्रसाईंलाई ‘हावा मान्छे’ भनेर टिप्पणी गर्नुभएको हो । ‘तीनकुनेमा राजावादी भन्नेहरूले नेवार कन्याहरूलाई अगाडि राखेर बडो नेवार समुदाय हामीसँग छ भन्ने देखाउन खोजे’ प्रशिक्षणमा उहाँले भन्नुभयो– तर एउटा दुर्गा प्रसाईं भन्ने छ नि, त्यो चाहिँ हावा हावा छ मान्छे । त्यो हामीले बुझेकै कुरा हो ।’

माओवादी अध्यक्ष दाहालले प्रसाईंले आफूहरुको आन्दोलनलाई नेवारी समुदायले साथ नदिएको आरोप समेत लगाउने गरेको उल्लेख गर्नुभयो । ‘उनले आफूहरुको आन्दोलनलाई नेवा समुदायले साथ दिएन भन्दै हिँडेका छन्’ उहाँले भन्नुभयो – ‘यो कुरा पनि नेवार समुदायले बुझाइदिनुपर्छ किन कि त्यसो भनेको पनि ठिकै हो । नेवारले साथ दिँदैनन्–गणतन्त्र विरोधीलाई, निरंकुशताको पक्षपातीलाई ।’