काठमाडौँ । गायिका एलिना चौहानले पति विष्णु सापकोटाविरूद्ध सम्बन्ध विच्छेदको मुद्दा दायर गर्नुभएको छ । उहाँले जिल्ला अदालत काठमाडौँमा शुक्रबार मुद्दा दायर गर्नुभएको हो । 

गत वैशाखमा विवाह गरेर उहाँ पति विष्णुसँग अस्ट्रेलियामा बस्दै आउनुभएको थियो । तर अस्ट्रेलियामा रहँदा कार्यक्रममा भाग लिन जाँदा विभिन्न शंका गरेर पतिले मानसिक दबाब दिएको उहाँले अदालतमा दायर गरेको फिराद पत्रमा उल्लेख छ ।

एलिनाले यसरी आफ्नो चरित्रमाथि शंका उपशंका गरेर सम्बन्धअगाडि नबढ्ने भन्दै सम्बन्धविच्छेदको मुद्दा दायर गर्नुभएको हो । उहाँले अंश तथा माना चामल नलिने गरी सम्बन्ध विच्छेदको मुद्दा दायर गर्नुभएको हो । 

फिरादपत्रमा उहाँले ‘मुलुकी देवानी कार्यविधि संहिता, २०७४को दफा ९५ (ग) का आधारमा सम्बन्ध विच्छेद गरी स्वतन्त्र भई आ आफ्नो जीवन बिताउन श्रेयष्कर लागेकोले निज विपक्षीबाट अंश तथा माना चामल नलिने गरी यो फिरादपत्र लिइ सम्मानित अदालतसमक्ष उपस्थित भएकी छु’ भन्ने व्यहोराको फिरादपत्र दर्ता गर्नुभएको छ ।