झापा । जिल्लाको चालु आर्थिक वर्षको ६ महिनामा पुँजीगत खर्च २० दशमलव ४० प्रतिशत भएको छ । 

कोष तथा लेखा नियन्त्रण कार्यालयका सूचना अधिकारी मनोज तिम्सिनाका अनुुसार जिल्लाका निम्ति १० अर्ब ५५ करोड ६९ लाख ८३ हजार १ सय १० रुपैयाँ विनियोजन भएकोमा पुस मसान्तसम्म २ अर्ब १५ करोड ३६ लाख २ हजार ८ सय ८४ रुपैयाँ खर्च भएको छ । ‘चालुतर्फ विनियोजित  १६ अर्ब चार करोड ८९ लाख ४५ हजारमध्ये ४५ दशमलव २६ अर्थात् ७ अर्ब २६ करोड ६३ लाख रुपैयाँ खर्च भएको छ’ उहाँले भन्नुभयो ।

समग्रमा चालु आवको ६ महिनामा ४५ दशमलव २६ प्रतिशतअर्थात् ९ अर्ब ४१ करोड ६६ लाख ९ हजार खर्च भएको कोष नियन्त्रक तिम्सिनाले बताउनुभयो । उहाँका अनुसार समयमै बजेट निकासा हुँदा पनि जिल्लास्थित सङ्घीय कार्यालय तथा स्थानीय तहले पुँजीगत खर्च बढाउन नसकेका हुन् ।   

चालु आवको पुस महिनासम्ममा जिल्लाभर ९ अर्ब ८८ करोड २६ लाख ७१ हजार ४ सय २८ रुपैयाँ राजस्व सङ्कलन भएको छ । 

त्यसअवधिमा  सबैभन्दा धेरै मेची भन्सार कार्यालयले ७ अर्ब ५१ करोड ३५ लाख ५५ हजार रुपैयाँ राजस्व सङ्कलन गरेको छ ।