गण्डकी ।  पोखरा महानगरपालिका–२८ कालिका ध्रुवपुरका हरिप्रसाद त्रिपाठीले  बाँझो जग्गामा यसैवर्षदेखि कागतीखेती शुरु गर्नुभएको छ । 

गाउँबेँसी एकीकृत कृषि केन्द्रका सञ्चालक समेत रहनुभएका उहाँले व्यावसायिक रुपमा कागतीखेती शुरु गरेको बताउँदै हाल २६ रोपनी क्षेत्रफलमा ५ सय ८४ ‘तेह्रथुमे’ जातका कागतीका बिरुवा हुर्किरहेका जानकारी दिनुभएको छ । कागतीखेतीका लागि उहाँले पहाडी क्षेत्र काष्ठफल तथा फलफूल विकास आयोजना, आयोजना कार्यान्वयन एकाइ गण्डकी प्रदेशअन्तर्गत फलफूल बगैँचा स्थापना कार्यकमबाट अनुदान सहयोग पनि पाउनुभएको छ । 

कार्यक्रमका लागि कूल लागत ७ लाख ८१ हजार ४ सय  रुपैयाँ रहेकामा आयोजनाबाट ३ लाख ९० हजार ७ सय रुपैयाँ स्वीकृत अनुदान रहेको छ भने ३ लाख ९० हजार ७ सय रुपैयाँ त्रिपाठी स्वयंले व्यहोर्नुहुनेछ । 

कागतीको उत्पादन गर्दै आय बढाउने र यसबाट रोजगारी सृजना गर्ने उहाँको लक्ष्य  छ ।