काठमाडौँ । विभिन्न बैंकले कर्जाको ब्याजदर घटाएसँगै शेयर बजार उच्च अंकले वृद्धि भएको छ । 

नेपाल स्टक एक्सचेञ्ज (नेप्से) परिसूचक मंगलबार ५४ दशमलव ५४ अंक अर्थात् २ दशमलव ५७ प्रतिशतले बढेर २ हजार १ सय ७५ दशमलव १७ को विन्दुमा अडिएको छ । मंगलबार ३ सय चार कम्पनीको २ करोड ३३ लाख ७० हजार ५३ कित्ता शेयर,  १ लाख ३३ हजार ६१ पटक खरिदबिक्री हुँदा ८ अर्ब २ करोड ३८ लाख ६२ हजार ४ सय ६ रुपैयाँ बराबरको कारोबार भएको छ ।

नेप्सेका सबै सूचक तथा उपसूचक हरियो देखिएका छन् । सेन्सेटिभ इन्डेक्स दुई दशमलव ३८, फ्लोट इन्डेक्स २ दशमलव ७२ र सेन्सेटिभ फ्लोट इन्डेक्स २ दशमलव ५९ प्रतिशतले बढेको छ । सबै समूहका उपसूचक बढेका छन् । सबैभन्दा धेरै वित्त समूहको उपसूचक ४ दशमलव ७५ र लगानी समूहको उपसूचक ३ दशमलव ७० प्रतिशतले बढेका छन् ।

 ५ कम्पनीको शेयर मूल्यमा सकारात्मक सर्किट लागेको छ । बुटवल पावर कम्पनी लिमिटेड, युनाइटेड मोदी हाइड्रोपावर लिमिटेड, हिमालयन पावर पार्टनर लिमिटेड, एनआरएन इन्फ्रास्ट्रक्चर एन्ड डेभलपमेन्ट लिमिटेड र नेपाल वेयरहाउसिङ कम्पनी लिमिटेडको शेयर मूल्य १० प्रतिशतले बढेको हो । आज सबैभन्दा धेरै घट्नेमा भने ज्योति विकास बैंक बन्ड २०८७ को शेयर मूल्य ९ दशमलव ९९ प्रतिशतले घटेको छ ।

कारोबार रकमका आधारमा सबैभन्दा धेरै सोनापुर मिनरल्स एन्ड आयल लिमिटेडको  २८ करोड ३१ लाख ५५ हजार ८ सय २ रुपैयाँ बराबरको कारोबार भएको छ । कारोबार भएका शेयर सङ्ख्याका आधारमा भने सबैभन्दा धेरै हिमाल दोलखा हाइड्रोपावर कम्पनी लिमिटेडको ११ लाख ५० हजार १ सय ३४ कित्ता शेयर किनबेच भएको छ ।