काठमाडौँ । प्रधानमन्त्री कप राष्ट्रिय क्रिकेट प्रतियोगितामा नेपाल एपीएफ क्लबले बागमती प्रदेशलाई पराजित गर्दै प्रतियोगितामा सुखद शुरुवात गरेको छ । 

कीर्तिपुरस्थित त्रिवि क्रिकेट मैदानमा आइतबार भएको खेलमा एपीएफले बागमती प्रदेशमाथि ८९ रनको जित निकालेको हो । जितका लागि २  सय ४२ रनको विजयी लक्ष्य पछ्याएको बागमती ४२ दशमलव ५ ओभरमा सबै विकेट गुमाउँदै १ सय ५२ रनमा समेटियो । 

बागमतीका लागि कप्तान रित गौतमले सर्वाधिक ६६ रनको योगदान दिए । उनले ८९ बलमा आठ चौकासहित सर्वाधिक ६६ रन बनाएका हुन् । ओपनर आशुतोष घिरैयाले ५७ बलमा ५ चौकासहित ४१ रन बनाए । त्यसबाहेक अन्य कुनै पनि ब्याटरले राम्रो प्रदर्शन गर्न सकेनन् ।

बलिङतर्फ एपीएफका रोहित पौडेलले ४ विकेट लिए भने अभिनाश बोहरा र श्याम ढकालले समान २,२  विकेट लिए । पुरन विक र भुवन कार्कीले समान १,१ विकेट लिए । त्यसअघि टस हारेर पहिला ब्याटिङ गरेको एपीएफले निर्धारित ५० ओभरमा ९ विकेट गुमाउँदै २  सय ४१ रनको योगदान बनाएको थियो । एपीएफका लागि सन्दीप जोराले १ सय ३ बलमा शतक पूरा गरे । उनले सन्दीपले १ सय १७ बलमा ७ चौका र ५ छक्का प्रहार गर्दै १ सय १२ रनको योगदान दिए । 

लोकेश बमले २७ रन जोडे भने अमर रौतेलाले २२ रन बनाए । आसिफ शेखले १५ रन बनाए । प्रज्वल शाही र भुवन कार्कीले समान १०÷१० रन बनाए । 

बलिङतर्फ बागमतीका सूर्य तामाङले ३  विकेट लिए भने प्रतिश जिसी र रिजन ढकालले समान १,१ विकेट लिए । सोनु देवकोटाले १ विकेट लिए । यस हारसँगै बागमती प्रदेशको यो दोस्रो हार हो । हिजो भएको पहिलो खेलमा बागमती नेपाल पुलिस क्लबसँग ६८ रनले पराजित भएको थियो ।