काठमाडौँ ।  प्रधानमन्त्री केपी शर्मा ओलीले उत्कृष्ट हुने क्याम्पस तथा विद्यालयलाई ‘राष्ट्रिय शिक्षा पुरस्कार’बाट पुरस्कृत गर्नुभएको छ । 

राष्ट्रिय शिक्षा दिवसका अवसरमा आज आयोजित गरेको कार्यक्रममा प्रधानमन्त्री ओलीले उत्कृष्ट क्याम्पस र विद्यालयलाई ‘राष्ट्रिय शिक्षा पुरस्कार’बाट पुरस्कृत गर्नुभएको हो । यस वर्ष उत्कृष्ट क्याम्पस राष्ट्रिय पुरस्कार कास्कीको लेखनाथस्थित स्कूल अफ बिजनेसले पाएको छ । त्यो क्याम्पसले दुई लाख ५० हजार रुपैयाँ पुरस्कार प्राप्त गरेको हो । 

सामुदायिक क्याम्पसतर्फ ललितपुरको चापागाउँस्थित जनभावना क्याम्पस र  निजी क्याम्पसमध्येबाट काठमाडौँको मनमोहन मेमोरियल इन्स्टिच्युट अफ हेल्थ साइन्सेज पुरस्कृत भएका छन् । दुवैले जनही दुई लाख ५० हजार रुपैयाँसहित प्रमाणपत्र प्राप्त गरेका छन् । 

सार्वजनिक विद्यालयतर्फ २०८० सालको माध्यमिक शिक्षा परीक्षामा प्राप्त गरेको नतिजाका आधारमा दाङको तुलसीपुरस्थित तुलसीपुर माविले प्रथम स्थान हासिल गर्दै राष्ट्रिय शिक्षा पुरस्कार पाएको छ । त्यो विद्यालयले  तीन लाख रुपैयाँसहित शिल्ड, ध्वजा र प्रमाणपत्र प्राप्त गरेको छ । 
 
विश्वनिकेतन मावि काठमाडौँले द्वितीय स्थान हासिल गर्दै २ लाख रुपैयाँ रुपैयाँसहित शिल्ड, ध्वजा र प्रमाणपत्र प्राप्त गरेको छ । तृतीय हुने दाङको शान्तिनगरस्थित जनकल्याण माविले १ लाखसहित शिल्ड, ध्वजा र प्रमाणपत्र पाएको छ । 

निजीतर्फ २०८० सालको माध्यमिक शिक्षा परीक्षामा प्रथम हुने काठमाडौँको टोखा नगरपालिका–८ स्थित फलोसेन्ट माविले ३ लाख रुपैयाँसहित शिल्ड, ध्वजा र प्रमाणपत्र पाएको छ । द्वितीय हुने बिजेश्वरी ज्ञान मन्दिर सैनिक महाविद्यालय काठमाडौँले २ लाख रुपैयाँसहित शिल्ड, ध्वजा र प्रमाणपत्र तथा तृतीय हुने काठमाडौँकै बूढानीलकण्ठ स्कूलले १ लाख रुपैयाँसहित शिल्ड, ध्वजा र प्रमाणपत्र प्राप्त गरेको छ । 

सयैगरी प्राविधिक शिक्षालयतर्फ सर्वोत्कृष्ट नतिजा ल्याउने नेपाल बनेपा बहुप्राविधिक बनेपा, काभ्रेपलाञ्चोक, तुलसीपुर पोलिटेक्निक इन्स्टिच्युट तुलसीपुर, दाङ, जनता मावि वाणगङ्गा, कपिलवस्तु र नेपाल आर्मी कलेज अफ हेल्थ साइन्स, काठमाडौँलाई १ लाख रुपैयाँसहित राष्ट्रिय शिक्षा पुरस्कार प्रदान गरिएको छ । ती शिक्षालयलाई प्राविधिक शिक्षा तथा व्यावसायिक तालिम परिषद्बाट सञ्चालन गरेको परीक्षामा सर्वोकृष्ट नतिजा ल्याएका आधारमा पुरस्कृत गरिएको हो । 

दिवसकै अवसरमा समाज कल्याण शिक्षा पुरस्कार युवा क्रियाकलाप उत्थान केन्द्र कागेश्वरी मनोहरा र सी आशा फाउन्डेशन ललितपुरलाई प्रदान गरिएको छ । ती दुवै संस्थालाई जनही २ लाख रुपैयाँसहित प्रमाणपत्र प्रदान गरिएको छ । 

त्यस अवसरमा प्रधानमन्त्री ओलीले शैक्षिक स्मारिका–२०८१ विमोचन गर्नुभयो ।