मोरङ । प्रमुख प्रतिपक्ष दल नेकपा एमालेले कोशी प्रदेशको सभामुखमा सत्ता गठबन्धनका उम्मेदवारलाई नै समर्थन गर्ने भएको छ । 

एमालेको मंगलबार बसेको बैठकले सभामुख जित्न सक्ने अवस्था नरहेको ठहर गर्दै उम्मेदवारी नदिने निर्णय गरेको छ । एमालेले सभामुखमा सत्ता गठबन्धनको समर्थनमा उम्मेदवारी दिने तयारी गरेका राप्रपाका अम्बरबहादुर बिष्टलाई समर्थन गर्ने निर्णय गरेको हो । कोशीमा सभामुखको निर्वाचन आज दिउँसो ३ बजे हुँदैछ ।

एमाले सांसद लिलाबल्लभ अधिकारीले सभामुखमा राप्रपाका बिष्टलाई समर्थन गर्ने निर्णय भएको जानकारी दिनुभयो ।  एमालेको पनि समर्थन पाएपछि बिष्ट सर्वसम्मत सभामुख बन्ने सम्भावना देखिएको छ । बिष्ट राप्रपाका समानुपातिक सांसद हुनुहुन्छ । 

कोशीमा बिष्ट सभामुख बनेपछि राप्रपाको दुई प्रदेशमा सभामुख हुनेछन् । बागमती प्रदेशसभामा पनि राप्रपाकै भुवनकुमार पाठक सभामुख हुनुहुन्छ ।