चौतारा ।  सिन्धुपाल्चोकको बलेफी गाउँपालिका–३  चिलाउने गाउँस्थित  ठूलो छाँगा आन्तरिक एवं बाह्य पर्यटकको रोजाइमा परेको छ । 
 
बलेफी गाउँपालिकाको पहलमा ठूलो छाँगामा क्यानोनिङ र रक क्लाइम्बिङ गरिन थालिएपछि आन्तरिक पर्यटकको रोजाइमा परेको हो । पहिले छाँगामा पुग्नै आँट नआउने स्थानीयवासी प्रितमकुमार तामाङ अहिले आफैँ क्यानोनिङ र रक क्लाइम्बिङमा रमाउने गर्नुभएको छ । ‘पहिला जान निकै डर लाग्थ्यो अनि जान्दिन थिएँ, अहिले आफैँले क्यानोनिङ र रक क्लाइम्बिङ गर्न पाउँदा निकै खुशी छु’ उहाँले भन्नुभयो ।  

बलेफी–३ मा रहेको ठूलो छाँगामा क्यानोनिङ र रक क्लाइम्बिङको सपना  प्रितमलेनै  गाउँवासीलाई सुनाउनुभएको थियो । पाँच वर्षअघि सुन्दरीजलको जङ्गलभित्रको झरनामा क्यानोनिङ फेस्टिभलमा पुग्नुभएको प्रितमले गाउँको ठूलो झरनामा यस्तै गर्न पाए हुने भन्ने सोच्नुभएको थियो । अहिले स्थानीय सरकारसामु उहाँले त्यसको प्रस्ताव राखेपछि गाउँपालिकाले यसको पहल थालेको उहाँ बताउनुहुन्छ । 

क्यानोनिङ र रक क्लाइम्बिङमा सहभागी हुने गरेका स्थानीयवासी आसिम तामाङ पनि निक्कै खुशी हुनुहुन्छ र शुरुमा डोरीको सहायताले झरनाबाट झर्नुपर्ने सुनेर आफू डराएको उहाँले अनुभव सुनाउनुभयो । ‘निकै डर लागेको थियो तर प्रशिक्षकबाट यसबारे जानकारी पाएपछि आत्मबल बढ्यो अनि क्यानोनिङ र रक क्लाइम्बिङ दुवै गरेंँ’ उहाँ भन्नुहुन्छ । बलेफीको आव २०८०/८१ मा विनियोजन गरेको तीन लाख ५० हजार बजेटबाट सोही झरनामा यससम्बन्धी आधारभूत पूर्वाधार तयार गरिएको वडाध्यक्ष रितेश तामाङले जानकारी दिनुभयो ।

ठूलो छाँगामा क्यानोनिङका लागि तीन स्तरको झरना रहेको छ । वडाध्यक्ष तामाङका अनुसार माथिल्लो झरना (अर्थात पहिलो)  करिब ९  मिटरकोशमा आधारभूत अर्थात सिकारुलाई सिक्न, बीचको करिब १२ मिटरको झरनामा सिकेर केही जान्नेलाई र तल्लो अर्थात तेस्रो झरनामा करिब १७ मिटरकोमा एड्भान्सहरुका लागि छुट्याइएको छ ।

ठूलो छाँगा क्यानोनिङ र रक क्लाइम्बिङका लागि उत्कृष्ट गन्तव्य बनेपछि गाउँपालिकाले स्थानीय १० युवाहरुलाई यससम्बन्धी दुई दिने आधारभूत तालिमसमेत दिएको छ । ३ जना प्रशिक्षक फिल्डमै पुगेर क्यानोनिङ र रक क्लाइम्बिङ गर्दा अपनाउनुपर्ने सुरक्षा नियम, डोरी लगाउने तरिकादेखि झरनामा झर्ने र चड्ने उपयुक्त तरिका सिकाएका छन् । 

शुरुमा प्रशिक्षकको टिम र प्रशिक्षार्थीको टिमले ३ वटै झरनामा सफलतापूर्वक क्यानोनिङ र क्लाइम्भिङ गरेका थिए । अहिले यहाँ क्यानोनिङ र रक क्लाइम्बिङ गर्न आउनेहरुको चासो बढेको गाउँपालिकाले जनाएको छ ।

गाउँपालिकाका उपाध्यक्ष सरु लामा तामाङले ठूलो छाँगा साहसिक खेलको केन्द्र बनाउन निरन्तर लागिरहेको बताउनुभयो । पालिकाभित्र रहेको यस्तै स्थानमा पूर्वाधार निर्माण गर्न सके काठमाडौँबाट करिब ८५ किलोमिटर मात्र रहेको यो स्थानलाई अझै प्रवद्र्धन गर्न सके स्थानीयका लागि आर्थिक उपार्जन र रोजगारीको केन्द्र बन्न सक्ने उहाँको  विश्वास छ । अहिले बलेफीवासी र गाउँपालिका यसको प्रचार, संरक्षणमा जुटेको छ । पर्यटनबाट समृद्ध बलेफी निर्माणमा सघाउ हुने विश्वाससहित पर्यटन प्रवद्र्धनमा गाउँपालिकाले जोड दिएको हो । 

अध्यक्ष गङ्गाबहादुर तामाङले बलेफीभित्र यस्तै थुप्रै पर्यटकीय सम्भावना भएका स्थान रहेकाले ती स्थानहलाई प्रवद्र्धन गर्न लागिपरेको बताउनुभयो ।  उहाँले बलेफीमा अब साहसिक खेल -याफ्टिङसँगै क्यानोनिङ र रक क्लाइम्भिङ पनि थपेकोमा खुशी व्यक्त गर्नुभयो ।