काठमाडौँ ।  प्रधानमन्त्री पुष्पकमल दाहालले त्रिभुवन विश्वविद्यालयको विज्ञापन सच्चाउन निर्देशन दिनुभएको छ । विश्वविद्यालयले उपकुलपति खुला प्रतिस्पर्धाबाट छनौट गर्न खोजेपछि प्रधानमन्त्रीले त्यसलाई रद्द गर्न निर्देशन दिनुभएको हो । 

त्रिवि कुलपति समेत रहनुभएका दाहालले शिक्षा, विज्ञान तथा प्रविधिमन्त्री एवं विश्वविद्यालयका सहकुलपति अशोककुमार राईलाई  शुक्रबार आफ्नो कार्यकक्षमा बोलाएर विज्ञापन सच्चाउन निर्देशन दिनुभएको हो । 

सहकुलपति राईले  विश्वविद्यालयको सुधारका निम्ति संसारभर रहेका नेपालीमध्येबाट योग्य मान्छे आओस् भनेर खुला प्रतिस्पर्धा गराउन खोजिएको प्रधानमन्त्रीलाई स्मरण गराउनुभएको थियो । तर प्रधानमन्त्रीले  विश्वविद्यालयले प्रकाशित गरेको विज्ञापनले योग्य मान्छेहरू छनोटमा ढोका बन्द हुनसक्ने भन्दै त्यसलाई सच्चाएर अर्को विज्ञापन निकाल्न निर्देशन दिनुभएको हो । 
 
शुक्रबार छनोट तथा सिफारिस समितिका तर्फबाट प्रकाशित सूचनामा ‘विश्वविद्यालयको पदाधिकारीमध्ये कुनै एक पदमा कम्तीमा ३ वर्ष काम गरेको (वर्ष, महिना र दिनसमेत) व्यहोरा खुलेको विवरण प्रमाणित प्रतिलिपि’ पेश गर्नुपर्ने उल्लेख थियो । त्यही सम्बन्धमा आफ्नो गम्भीर ध्यानाकर्षण भएको बताउँदै प्रधानमन्त्रीले पदाधिकारीमा ३ वर्षे अनुभवको प्रावधान हटाउन निर्देशन दिनुभएको प्रधानमन्त्रीको सचिवालयले जनाएको छ ।

प्रावधानले पूर्वपदाधिकारीहरू मात्रै प्रतिस्पर्धाका निम्ति योग्य हुने र अन्य योग्यलाई अयोग्य बनाउनेप्रति आफ्नो चासो रहेको भन्दै प्रधानमन्त्रीले सक्षम र योग्य मान्छे आउने बाटो सम्पूर्ण रूपले खुला गरी अर्को विज्ञापन प्रकाशित गर्न मन्त्रालयमार्फत समितिलाई निर्देशन दिनुभएको हो । 

प्रधानमन्त्रीले स्वदेश तथा विदेशमा रहेको जोकोही योग्य प्राज्ञिक नेपालीले दरखास्त हाल्नसक्ने गरी फराकिलो मापदण्ड नबनाए विश्वविद्यालय सुधार कठिन भएकाले उच्च शिक्षाको गुणात्मक सुधारका निम्ति गम्भीर हुन पनि शिक्षामन्त्रीलाई निर्देशन दिनुभएको छ ।