काठमाडौँ । राइड शेयरिङ एप टुटलका संस्थापक शिक्षित भट्टलाई प्रहरीले पक्राउ गरेको छ । भट्टलाई काठमाडौँ प्रहरी परिसरको टोलीले बिहीबार राति पक्राउ गरेको हो । 

प्रतिलिपि अधिकारको उल्लंघन गरेको र आपराधिक विश्वासघात गरेको जाहेरी परेपछि भट्टलाई पक्राउ गरिएको काठमाडौं प्रहरी प्रमुख एसएसपी भुपेन्द्र खत्रीले बताउनुभएको छ । 

एसएसपी भुपेन्द्र खत्रीका अनुसार यो विवाद टुटलसँगै सम्बन्धित छ । भट्टका साथीहरुले शुरुमा प्रतिलिपि अधिकार रजिष्ट्रारको कार्यालयमा उजुरी दिएका थिए । त्यहाँबाट यो विषय प्रहरीसम्म पुगेको हो । 
‘साथीहरुबीचकै विवाद जस्तो देखिएको छ, अर्को पक्षलाई बोलाएका छौं’ एसएसपी खत्रीले भन्नुभयो । 

राइड शेयरिङ एप टुटल नाकाबन्दीपछि नेपालमा सञ्चालनमा आएका हो । त्यस लगत्तै पठाओसहितका केही राइड सेयरिङ एप पनि सञ्चालनमा आएपछि टुटल  बन्द भएको थियो ।  टुटल केही महिनाअघि पुन सञ्चालनमा ल्याइएको हो ।