काठमाडौँ । संयुक्त अरब इमिरेट्स (यूएई) मा जारी एसीसी यू-१९ एसिया कप क्रिकेट प्रतियोगिताको आफ्नो पहिलो खेलमा शुक्रवार नेपालले पाकिस्तानलाई एक सय ५३ रनको सामान्य लक्ष्य दिएको छ । टस हारेर पहिले ब्याटिङको निम्तो पाएको नेपालले ४७.२ ओभरमा अलआउट हुनुअघि एक सय ५२ रन बनायो ।

नेपालका लागि उत्तम थापा मगरले सर्वाधिक ५१ रन बनाए । दिपेश कँडेलले पनि ३१ रनको योगदान गरे । ओपनर अर्जुन कुमालले २१ रन बनाए । नेपालले अतिरिक्त रूपमा २१ रन पायो । नेपालका माथिल्लो क्रमका ब्याट्सम्यान खासै चल्न सकेनन् । 

पाकिस्तानी टोलीका बलर मोहम्मद जिसन सबैभन्दा प्रभावकारी ठहरिए । उनी एक्लैले ६ विकेट लिएका थिए । उनले ९.२ ओभरमा एक मेडन राख्दै केवल १९ रन खर्चिएका थिए । अमिर हसनले पनि दुई विकेट हात पारे । उबैद शाह र अली असफान्दले पनि एक-एक विकेट लिए । नेपालले अन्तिम विकेटका रूपमा आकाश चन्दलाई पाँच रनमा गुमाएको थियो । उनलाई पनि जिसनले नै बोल्ड गरेका थिए । सुवास भण्डारी आठ रनमा अविजित रहे ।