काडमाडौँ । निर्वाचन आयोगले १५ वैशाखमा हुने उपनिर्वाचनका लागि चैत २२ मा अन्तिम नामावली प्रकाशन गर्ने जनाएको छ । 

प्रदेशसभा सदस्य चयनका लागि इलाम-२ र प्रदेशसभा सदस्यका लागि बझाङ-१ को १ मा १५ वैशाखमा हुने निर्वाचनका लागि आयोगबाट मतदाता नामावली अद्यावधिक तथा अन्तिम नामावली प्रकाशन कार्यक्रम २०८० स्वीकृत भएको आयोग प्रवक्ता शालिग्राम शर्मा पौडेलले जानकारी दिनुभयो ।  

स्वीकृत कार्यक्रमअन्तर्गत १८ फागुनमा आयोगको वेबसाइटमा मतदाता नामावली प्रकाशन गरिने छ । उक्त मतदाता नामावलीमा रहेका त्रुटि सच्याउन, दोहोरो नाम हटाउन, मृत्यु भएका वा नागरिकता त्याग गरेका मतदाताको नाम हटाउन र झुट्टा विवरण दिई नाम समावेश भएको भए उजुरी दिन फागुन २९ देखि चैत ५ सम्मको अवधि निर्धारण गरिएको उहाँले जानकारी दिनुभयो ।  

उक्त अवधिमा निर्वाचन कार्यालय वा वडा कार्यालयमार्फत निवेदन, सूचना र उजुरी दिन सकिनेछ । यसरी प्राप्त निवेदन, सूचना र उजुरी उपर कानून बमोजिम छानबिन गरी मतदाता नामावली अद्यावधिक गरिने आयोगले जनाएको छ । अद्यावधिक गरी तयार गरिएको अन्तिम मतदाता नामावली चैत २२ मा प्रकाशन गरिने कार्यक्रम रहेको प्रवक्ता पौडेलले बताउनुभयो ।