मोरङ । बूढीगंगा गाउँपालिका–७ की एक महिलालाई छिमेकीले बोक्सीको आरोपमा यातना दिएर मलमूत्र खुवाएका छन् । 

५५ वर्षीय महिलालाई छिमेकीले बोक्सी आरोप लगाउँदै बिहीबार दिउँसो यातना दिंदै मलमूत्र खुवाएका हुन्। बोक्सीको आरोपमा मलमूत्र खुवाउनेलाई प्रहरीले पक्राउ गरेको छ । बोक्सीको आरोपमा मलमूत्र खुवाउने बूढीगंगा–७ की ५० वर्षीया पारो माझी पक्राउ परेकी हुन् । प्रहरीका अनुसार माझी गाउँकी धामी हुन् ।

मोरङ प्रहरीका प्रवक्ता डिएसपी रन्जनकुमार दाहालले मलमूत्र खुवाएर अमानवीय व्यवहार गरेको उजुरी परेपछि माझीलाई पक्राउ गरिएको जानकारी दिनुभएको छ। डिएसपी दाहालका अनुसार बिहीबार माझीको घरमा लगाइएको अष्टम पूजामा प्रयोग गरिएको दियो हराएको थियो । हराएको दियो जोखाना हेरेर खोज्ने क्रममा पीडितले चोरेको भन्दै माझीले कुटपिट गरेकी हुन् । 

प्रहरीले पीडितले दिएको किटानी जाहेरीका आधारमा माझीविरुद्ध बोक्सी आरोपको कसुरमा मुद्दा चलाउने तयारी गरेको छ ।