काठमाडौँ । आगामी आर्थिक वर्ष २०८१र८२ को बजेट १८ खर्ब रुपैयाँको हुने भएको छ । अर्थमन्त्री डा प्रकाशशरण महतले आगामी आर्थिक वर्षको बजेट सिलिङबारे जानकारी गराउनु भएको छ । 

अर्थमन्त्रीले शुक्रबार पत्रकार सम्मेलन गरेर मुलुकको आर्थिक अवस्था र आगामी बजेटबारे जानकारी गराउनु भएको हो । राष्ट्रिय योजना आयोगका उपाध्यक्षको नेतृत्वमा रहने स्रोत समितिले सरोकारवाला निकायबीच छलफलपछि बजेट सिलिङ तोकेको उहाँको भनाई छ ।  

अर्थमन्त्रीले सार्वभौम संसद्ले पारित गरेको बजेट कटौती गर्न नमिल्ने समेत बताउनुभएको छ । मन्त्रालयमा आयोजित पत्रकार सम्मेलनमा अर्थमन्त्रीले चालु आर्थिक वर्षको बजेट कटौती गरिएको भन्ने समाचारको खण्डन गर्दै संसद्ले पारित गरेको बजेट मन्त्रालयले कटौती गर्न नसक्ने स्पष्ट पानुभएको हो ।  

अर्थमन्त्रीले यसले जनतामा द्विविधा उत्पन्न हुने बताउँदै बजेटको अर्धवार्षिक मूल्याङ्कन गरिएको स्पष्ट पार्नुभयो । बजेटको मध्यावधि मूल्याङ्कन गर्दै मन्त्रालयले चालु वर्षका लागि विनियोजन गरेको बजेटमा सवा दुई खर्ब बजेट कम गरिएको भन्ने समाचार केही दिन अघि सार्वजनिक भएको थियो ।

अर्थमन्त्रीले राजस्व र बजेट कार्यान्वयन प्रगतिको समीक्षा गरिएको बताउँदै अघिल्लो वर्षको तुलनामा १० प्रतिशत राजस्व वृद्धि भएकोसमेत जानकारी गराउनुभयो । मन्त्री डा महतले नियमसम्मत बढी राजस्व उठाउने र खर्च गरिने उल्लेख गर्दै उठेको राजस्वको आधारमा आय र व्ययको आकलन मात्रै गरिएको बताउनुभयो । सरकारले चालु वर्षमा १७ खर्ब ५१ अर्ब ३१ करोड २१ लाख रुपैयाँ विनियोजन गरेको थियो ।