पर्सा। औद्योगिक प्रतिष्ठानलाई  नापतौलको इजाजतपत्र प्रदान गरिएको छ ।  गुणस्तर तथा नापतौल कार्यालय वीरगञ्जले चालू आर्थिक वर्षको ६ महिनामा ७ सय ६६ व्यावसायिक तथा औद्यौगिक प्रतिष्ठानलाई नापतौल यन्त्र सञ्चालनका लगि नयाँ इजाजतपत्र प्रदान गरेको हो ।

कार्यालयका अनुसार मकवानपुर, चितवन, पर्सा, बारा तथा रौतहट जिल्लाका व्यवसायी तथा औद्योगिक प्रतिष्ठानलाई साउनदेखि पुस महिनासम्ममा इजाजतपत्र प्रदान गरिएको हो ।पाँच जिल्ला कार्यक्षेत्र रहेको सो कार्यालयले  छ महिनाका अवधिमा ३४  व्यवसायीको नापतौल यन्त्रको नवीकरण, २ हजार ५ सय १६  व्यवसायीको नापतौल यन्त्रको जाँच तथा नापतौलमा अनियमितता एवं ठगी गर्ने ७ सय ८६ व्यवसायीलाई कारबाहीसमेत गरेको छ ।  कार्यालय प्रमुख मनिषकुमार दासले  सो अवधिमा एक सय ५५  पेट्रोलियम पदार्थ बिक्री गर्ने पम्पको जाँच, चार सय ८६ वटा  पम्पको ‘नोजल ’जाँच तथा ६६  वेव्रिजको जाँच गरिएको बताइएको छ ।
 
त्यसअवधिमा २ सय ८८  ट्याङ्करको हेटाँैडामा   जाँच समेत गरिएको थियो । त्यो अवधिमा  कार्यालयका कर्मचारीहरुबाट  विभिन्न बजारक्षेत्रको १० स्थानमा  डोर सञ्चालन, एकल अनुगमन २० पटक तथा नौपटक संयुक्त अनुगमन समेत भएको थियो ।  यस कार्यबाट  ७३ लाख ७ हजार८ सय ५९ रुपैयाँ राजस्व सङ्कलन भएको कार्यालयका सूचना अधिकारी  सञ्जीव ठाकुरले जानकारी दिनुभयो ।