काठमाडौँ । सत्ता गठबन्धनले राष्ट्रियसभा अध्यक्षबारे छलफल थालेको छ ।  

राष्ट्रियसभाका अध्यक्ष गणेशप्रसाद तिमिल्सिनाको कार्यकाल २२ फागुनमा सकिँदैछ। नेकपा एमालेबाट एमालेबाट राष्ट्रियसभा अध्यक्ष बन्नुभएका तिमिल्सिनाको कार्यकाल सकिने दिन नजिकिँदै गइरहेपछि सत्ता गठबन्धनले  त्यसबारे छलफल थालेको हो । 

राष्ट्रियसभा अध्यक्षबारे  छलफल गर्न प्रधानमन्त्री निवास बालुवाटारमा सत्ता साझेदार दलको बैठक बसिरहेको छ । प्रधानमन्त्रीसहित सत्ता गठबन्धनका शीर्ष नेताहरु सहभागी बैठकमा राष्ट्रियसभा अध्यक्ष कसलाई बनाउने ? भन्नेबारे छलफल भएको बालुवाटार स्रोतले बताएको छ । स्रोतका अनुसार राष्ट्रियसभा अध्यक्ष सत्ता गठबन्धनको ठूलो दल नेपाली कांग्रेसले कृष्णप्रसाद सिटौलालाई बनाउन चाहेको छ । प्रतिनिधिसभामा ठूलो दलको हैसियतमा रहे पनि कांग्रेस राष्ट्रियसभा भने दोस्रो स्थानमा छ ।  राष्ट्रियसभामा फागुन २० गतेपछि कांग्रेसको १६ सांसद हुनेछ । 

फागुन २० गतेपछि राष्ट्रियसभामा नेकपा माओवादी केन्द्र  ठूलो दल बन्नेछ । राष्ट्रियसभामा माओवादी केन्दको १७ सांसद हुनेछन् ।  राष्ट्रियसभामा अहिले सबै भन्दा ठूलो दलको हैसियतमा रहेको एमाले फागुन २० पछि तेस्रो स्थानमा खुम्चिनेछ । राष्ट्रियसभामा एमालेको १० सांसद हुनेछ । एमालेबाट चोइटिएर बनेको नेकपा एकीकृत समाजवादीले पनि राष्ट्रियसभा अध्यक्ष छान्ने चलखेलमा निर्णायक हैसियत बनाएको छ ।  फागुन २० पछि राष्ट्रियसभामा एकीकृत समाजवादीको ९ सांसद हुनेछन् । सत्ता गठबन्धनमा रहेका राष्ट्रिय जनमोर्चाको दलीय सहमति अनुसार राष्ट्रपतिबाट दुर्गा पौडेल मनोनित भएपछि राष्ट्रियसभामा २ सांसद हुनेछन् । गठबन्धनकै अर्को दल जनता समाजवादी पार्टी (जसपा)ले पनि राष्ट्रियसभामा १ सांसद चुनेर प्रतिनिधित्व गराएको छ । 

स्रोतका अनुसार सत्ता गठबन्धनका नेताहरुबीच बिहीबार भएको छलफलमा कांग्रेसले राष्ट्रियसभा अध्यक्ष सिटौलालाई बनाउन अडान लिएको छ । माओवादी केन्द्रले भने भक्कुप्रसाद सुवेदीलाई अध्यक्ष बनाउन प्रस्ताव गरेको छ ।