काठमाडौँ । बाँसबारी छाला जुत्ता कारखाको जग्गा प्रकरणमा पक्राउ परेका व्यवसायी अरुण चौधरीसहित ३ जना रिहा भएका छन् । 

च्याम्पियन फूटवेयर लिमिडेटका सञ्चालक चौधरीसहित ३ जना  काठमाडौँ जिल्ला अदालतको आदेशपछि बुधबार रिहा भएका हुन् ।   चौधरीसहित बाँसबारी छाला जुत्ता कारखाना लिमिटेडका तत्कालीन कार्यकारी अध्यक्ष अजिनारायण सिंह थापा र सिजी चाँदबाग रेसिडेन्सी प्रालिका सञ्चालक सञ्जय ठाकुर हाजिरी जमानीमा रिहा भएको केन्द्रीय अनुसन्धान ब्यूरो (सीआईबी) का प्रवक्ता तथा प्रहरी उपरीक्षक नवराज अधिकारीले जानकारी दिनुभएको छ । उहाँले भन्नुभयो– ‘जिल्ला अदालत काठमाडौँको आदेशअनुसार हाजिरी जमानीमा आज तीनै जनालाई छाडिएको छ, यद्यपि यो प्रकरणको अनुसन्धान भने जारी छ ।’ 

काठमाडौँ अदालतका न्यायाधीश यज्ञप्रसाद आचार्यको इजलासले सोमबार अनुसन्धानमा सहयोग गर्ने गरी हाजिर जमानीमा छाडी बाँकी अनुसन्धान पूरा गर्न सीआईबीलाई आदेश दिएको थियो ।

बाँसबारी छाला जुत्ता कारखानाको जग्गा निजीकरण गर्न खोजिएको भन्दै ब्यूरोले उनीहरुलाई पक्राउ गरेको हो ।