सुर्खेत । मुगुको खत्याड गाउँपालिकामा आगलागी हुँदा दाजुबहिनीको मृत्यु भएको छ । गाउँपालिकाको वडा नम्बर २ स्थित गाडेखोलामा लालु सञ्ज्यालको घरमा आइतबार राति आगलागी भएको हो । 

आगलागीमा सञ्ज्यालका १४ वर्षीय छोरा विशाल र १२ वर्षीया छोरी झरनाको मृत्यु भएको मुगुका प्रहरी  प्रमुख डिएसपी वीरेन्द्र थापाले जानकारी दिनुभएको छ । डिएसपी थापाका अनुसार सोमबार बिहान ६ बजेतिर गाडेखोलामा आगलागी भएको र दुई बालबालिका फेला नपरेको भन्ने खबर आएपछि जिल्लाबाट प्रहरी टोली घटनास्थलमा पुगेको थियो । आगलागीमा छोराछोरीको मृत्यु भएको तर आमा भने भागेर बाँच्न सफल भएको डिएसपी थापाले जानकारी दिनुभएको छ । 

डिएसपी थापाका अनुसार गोठभित्र रहेका चौपाया पनि आगलागीमा परी मरेका छन् । खाना पकाउने भान्सा कोठाबाट आगलागी शुरु भएको हो ।  आगलागीबाट घरमा धनसम्पत्ति, पशु चौपाय र खाद्यान्न जलेको छ ।