काठमाडौँ । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले वर्तमान सरकारलाई अलोकतान्त्रिक र भ्रष्टको संज्ञा दिनुभएको छ । 

एमाले अध्यक्ष ओलीले शुक्रवार पार्टी मुख्ष्यालय च्यासलमा बैंक, बीमा तथा वित्तीय क्षेत्र कर्मचारी संघको अधिवेशनलाई सम्बोधन गर्दै लोकतान्त्रिक पद्धति सरकारले भताभुङ्ग पारेको आरोप लगाउनुभयो । ‘यो कानुनअनुसार चल्ने, मूल्य मान्यता अनुसार चल्ने सरकार होइन । गैरकानुनी, बेतिथीसँग चल्ने सरकार हो’ उहाले भन्नुभयो– ‘यो काम नलाग्ने, अलोकतान्त्रिक भ्रष्ट सरकार हो ।  हेर्दा हेर्दै कस्तो सरकार बन्यो नेपालमा ? डेमोक्रेसी भनिन्छ । प्रणाली नै मास्यो त यहाँ ।’ 

ओलीले बैंकबाट ऋण लिँदा घटाउन वा बढाउन सकिने भनिएता पनि बढाउने काम मात्रै भइरहेको उल्लेख गर्नुभयो ।  ‘बैंकबाट ऋण लिँदा घटाउन वा बढाउन सकिने भनिएको छ, घटाउने त कुरै छैन’ उहाँले भन्नुभयो– ‘ एकतर्फीरूपमा बैंकहरूले ऋणीसँग भएको सम्झौतामा बदल्नुपर्छ भने दुवैतर्फको सहमति हुनुपर्छ । हामीलाई मर्का पर्‍यो अनि बढायौं भन्ने, अनि अर्कालाई परेको मर्का के त रु यसवर्ष बैंकको यति खर्ब मुनाफा क्या बात भन्दै आफैंलाई धाप लायो । अनि ऋणीहरू ?’