काठमाडौँ । राष्ट्रियसभा निर्वाचमा सातै प्रदेशमा मतदान जारी छ । मतपरिणाम आजै आउने निर्वाचन आयोगले जनाएको छ । 

राष्ट्रियसभाको १९ सदस्यका लागि सात प्रदेशका सम्बन्धित मतदानस्थल र केन्द्रमा मतदान भइरहेको छ ।  आयोगले  बिहान ९ देखि अपराह्न ३ बजेसम्म मतदानका लागि समय निर्धारण गरेको छ ।  मतदान सकिने बित्तिकै गणना प्रारम्भ  हुने  आयोगले  जनाएको छ ।  आयोगका सहायक प्रवक्ता श्रीधर पन्थीका अनुसार सातै प्रदेशमा  मतदान भइरहेको छ । आजै परिणाम सार्वजनिक हुनेछ । 

राष्ट्रियसभा सदस्यका लागि मतदाता रहेका प्रदेशसभा सदस्यको ५३ र गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभारका दरले गणना हुनेछ । हाल कायम प्रदेशसभा सदस्य ५ सय ४९ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख गरी १ हजार ४ सय ९८ मतदाता रहेका छन् । 

प्रदेशसभा सदस्य र स्थानीय तहका प्रमुख–उपप्रमुख गरी २ हजार ४७ मतदाता गरी कूल मतभार ५७ हजार ५ सय ५९ हुनेछ ।