काठमाडौँ । राष्ट्रियसभा निर्वाचनमा आज रातिदेखि मौन अवधि शुरु हुँदैछ ।

निर्वाचन आयोगले राष्ट्रियसभा चुनावका लागि सोमबार रातिदेखि प्रचार गर्न नपाइने जनाएको छ । आयोगले विज्ञप्ति जारी गर्दै मौन अवधिमा राजनीतिक दलका पदाधिकारी, उम्मेदवार, दलका भ्रातृ सङ्‍गठन तथा आचारसंहिता पालना गर्नुपर्ने अन्य व्यक्ति, संस्था वा निकायले निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा सम्मेलन, कार्यशाला गोष्ठी आदि गर्न नपाइने जनाएको हो । 

कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने,  सामाजिक सञ्‍जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोष्ट वा शेयर गर्न वा गराउन नहुने आयोगद्वारा प्रकाशित विज्ञप्तिमा उल्लेख छ । 

राष्ट्रियसभामा आउँदो फागुन २० गतेदेखि पदावधि सकिने २० जना सदस्य मध्ये १९ जनाको लागि माघ ११ गते  निर्वाचन हुँदैछ । त्यसदिन मतदाता बिहान ९ बजेदेखि दिउँसो ३ बजेसम्म हुने आयोगले जनाएको छ ।