काठमाडौँ ।  प्रधानमन्त्री पुष्पकमल दाहालले रुसी सेनामा भर्ती भएका नेपालीहरुलाई तत्कालै स्वदेश फर्काउन सकिने स्थिति नरहेको बताउनुभएको छ । 

युगाण्डाबाट आइतबार बिहान स्वदेश फर्कनुका प्रधानमन्त्रीले त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा रुसी सेनामा भर्ती भएका नेपालीहरुलाई फर्काउन पहल गरिए पनि रुसले मान्ने  स्थिति नरहेको जानकारी गराउनुभएको हो । 

प्रधानमन्त्री रुसी सेनामा भर्ती भएकाहरुलाई फर्काउन सरकारले गम्भीरतापूर्वक पहल गरिरहेको समेत जानकारी दिनुभयो ।  ‘रुसी सेनामा भर्ती भएका नेपालीहरु अहिले रुस(युक्रेन युद्धमै छन्’  उहाँले भन्नुभयो  ‘अहिले सरकारले भन्दावित्तिकै रुसले मान्दिहाल्ने स्थिति छैन ।’

प्रधानमन्त्री युगाण्डा रहँदा आफूले रुसको उपविदेशमन्त्रीलाई भटेर नेपालीहरुलाई स्वदेश फर्काइदिन आग्रह गरेको समेत सुनाउनुभयो । अवैध रुप रुस पुगेर त्यहाँको सेनामा भर्ती हुने क्रम रोक्न संचार माध्यमले पनि भूमिका खेल्नुपर्ने प्रधानमन्त्रीको भनाई छ । 

‘मिडियाहरुले जनतामा चेतना फैलाउन पर्यो’ उहाँले भन्नुभयो   ‘जहाँ पायो त्यहीँ सेनामा भर्ना हुने, अझ बाटो छलेर जाने गर्न भएन भनेर जनचेतना फैलाउन पर्यो ।’