काठमाडौँ । सत्तारूढ दल नेकपा एमालेले दरबारमार्गमा गरेको शक्ति प्रदर्शनका कारण आज दिनभर काठमाडौँको ट्राफिक व्यवस्थापन अस्तव्यस्त बन्यो । दरबारमार्गमा स्टेज बनाएर मुख्य सडक नै कब्जामा लिएको एमालेले भद्रकालीबाट र्‍याली निकालेको थियो । 

उपत्यकाको मुख्य स्थानमा सडक कब्जा गरेर सभा गर्दा ट्राफिक व्यवस्थापन निकै चुनौतीपूर्ण बन्यो । 

सत्तारुढ दलको प्रदर्शनकै कारण दिनभर जसो काठमाडौँका मुख्य स्थानहरू न्युरोड, सहिदगेट, सुन्धारा, जमल, भृकुटीमण्डप, भद्रकाली, त्रिपुरेश्वर, सिंहदरबार लगायतका क्षेत्रमा अत्यधिक जाम भयो । 

एमालेको शक्ति प्रदर्शनका कारण आमनागरिकले भने दुःख पाएका छन्। ‘हाम्रै भोटले उनीहरू सरकारमा गए, अहिले आन्दोलन गरेर हामीलाई दुःख दिइरहेका छन्। आखिर यो शक्ति प्रदर्शन केका लागि ? ’ एक घण्टादेखि सुन्धाराको जाममा दोलखामा हरिशरण काफ्लेले भन्नुभयो । 

सत्तारुढ दलले नागरिक धम्क्याउन सरकारी स्रोत र साधनको चरम दुरुपयोग गरेर जनतालाई दुःख दिएको उहाँको आरोप छ ।