उदयपुर । कटारी नगरपालिकामा फोहरमा नवजात शिशुको शव  भेटिएको छ ।  नगरपालिकाको वडा नम्बर ३ राजावासमा रहेको फोहर विसर्जनस्थल (डम्पिङसाइट)मा फालिएको फोहरमा नवजात शिशुको शव फेला परेको हो । 

फोहर सङ्कलन गरी फोहर छुट्याउने क्रममा कामदारले फोहरसँगै फालिएको फोहर कपडाभित्र शिशुको शव देखेको वडासदस्य पष्पु खाँले जानकारी दिनुभएको छ । शव देखेपछि स्थानीयले प्रहरीलाई खबर गरेको स्थानीय देव ढुङ्गेलले बताउनुभयो । वडासदस्य खाँका अनुसार बुधबार बिहान कटारी बजार क्षेत्रबाट नगरपालिकाको ट्र्याक्टरले सङ्कलन गरी लगेर फालेको फोहरमा शव भेटिएको हो ।  ‘आजै उठाइएको फोहरमा शव रहेछ’, वडासदस्य खाँले भन्नुभयो– ‘नगरपालिकाको ट्र्याक्टरमा शवलाई अस्पताल ल्याइएको छ ।’ इलाका प्रहरी कार्यालय कटारीले शव भेटिएको पुष्टि गर्दै अनुसन्धान जारी रहेको जनाएको छ । 

महिना पुगिसकेको जस्तो देखिने कपाल लगायतका अङ्ग बनिसकेको नवजात शिशुको शव भेटिएको प्रहरीले जनाएको छ ।