काठमाडौँ । प्रधानमन्त्रीको सचिवालयमा कार्यरत १३ जना हटाइएको छ ।  प्रधानमन्त्री पुष्पकमल दाहालले एक वर्ष कार्यकालको समीक्षापछि सचिवालयबाट १३ जनालाई हटाउनु भएको हो । 

प्रधानमन्त्रीको निर्देशन अनुसार माघ १ गते देखि सचिवालयका एक स्वकीय सहसचिव, ४ जना स्वकीय उपसचिव, एक स्वकीय शाखा अधिकृत, २ जना प्रशासन सहायक, २ जना कम्प्युटर सहायक र २ जना हलुका सवारी चालक जिम्मेवारी मुक्त भएका छन् ।  सचिवालयमा सहसचिव रहनुभउका नारायणप्रसाद ढुंगानासहित १३ जनालाई एक वर्षको कामको धन्यवादसहित बिदा गरिएको प्रधामनन्त्रीका प्रमुख स्वकीय सचिव सन्तु दरैले जानकारी दिनुभएको छ । 

प्रमुख स्वकीय सचिव दरैका अनुसार स्वकीय उपसचिवहरु रमेशप्रसाद गुरागाईं, ओमकुमारी पौडेल, सावित्रीकुमारी अधिकारी र कलबहादुर नाथलाई बिदा गरिएको छ ।  स्वकीय शाखा अधिकृत लाले कुमालसँगै प्रशासन सहायकद्वय युवराज शाह र रामलाल पराजुली पनि हटाइएको छ ।  

कम्प्युटर सहायक बासुदेव शर्मा तथा खड्क योगी, कार्यालय सहयोगी अविनाश वाइवा,  हलुका सवारी चालकद्वय रमेशप्रसाद घिमिरे र पवित्रबहादुर शाहीलाई पनि जिम्मेवारी मुक्त गरिएको छ ।