कोहलपुर । बाँकेको बैजनाथ गाउँपालिका वाड नम्बर ७ का कृषकहरूले वास्तविक किसानलाई लक्षित गरेर कार्यक्रम ल्याउन स्थानिय सरकारसंग माग गरेका छन् । 

किसानका समस्यालाई सम्बोधन हुने गरी स्थानिय सरकारले नीति तथा कार्यक्रम ल्याएर कृषि क्षेत्रलाई प्राथमिकतामा राख्न किसानहरुले माग गरेका छन् । अहिले भएका नीति तथा कार्यक्रममा समेटिएका कृषि लक्षित कार्यक्रमलाई पनि प्रभावकारी कार्यान्वयन गर्न किसानहरुले माग गरेका छन् । 

किसानको अबस्थामा सुधार नआएसम्म देशमा समृद्धि नहुने भन्दै किसानका समस्या सुनिदिन तथा कृषिमैत्री  नीति तथा कार्यक्रम ल्याउन माग गरेका हुन् । 

बैजनाथ गाउँपालिका ७ का किसान खडिराम थारूले किसानलाई माथि उठाए मात्र देशको समृद्धि हुने धारणा राख्नुभयो ।  किसानहरूले उत्पादन गरेका अन्नपातमा  विचौलिया हावी हुँदा समस्या उत्पन्न भएको उहाँको दाबी छ । कृषकले उत्पादन गरेका सामाग्रीले उपयुक्त बजार नपाउँदा समस्यामा परेको थारुलगायत अन्य किसानको गुनासो छ । 

किसानले उठाएका सवाल र गुनासोहरुको सम्बोधन गर्दै पालिका अध्यक्ष प्रकाश ब. शाही पालिकाले आगामी दिनमा कृषिक्षेत्रलाई प्राथमिकता दिएर किसानमैत्री कार्यक्रम ल्याउने प्रतिवद्धता व्यक्त गर्नुभयो । 

कृषि उत्पादन वृद्धि गर्न व्यवसायीक किसानहरूलाई मात्र नभएर जीविकोपार्जनका रुपमा खेतिकिसान गर्दै आएका किसानलाई समेत सरकारले प्राथमिकताका साथ कृषि कार्यक्रममा समेट्ने अध्यक्ष शाहीको धारणा छ ।