ताप्लेजुङ ।  ताप्लेजुङ गोल्ड कप २०८१ को आज पत्रकार सम्मेलनमार्फत आयव्यय विवरण सार्वजनिक गरिएको छ । सहयोग तथा टिकट बिक्रीबाट ५५ लाख ६४ हजार १ सय २९ रुपैयाँ आम्दानी भएको हो । 

कोषाध्यक्ष निरोज श्रेष्ठका अनुसार कार्यक्रम सम्पन्न गर्न  ७३ लाख २० हजार ७ सय ४८ रुपैयाँ खर्च भएको छ । हाल समितिले  १७ लाख ५६ हजार ६ सय १९ रुपैयाा तिर्न बाँकी रहेको छ । त्यो रकम स्थानीय तह, हाइड्रोपावर कम्पनी, सङ्घसंस्था तथा बास बिक्रीमार्फत सङ्कलित आम्दानीबाट तिर्ने योजना रहेको आयोजकले जनाएको छ ।

फुङलिङ नगरपालिकाले ५ लाख  रुपैया सहयोग गरेको छ ।  मेरिङदेन र मैवाखोला गाउँपालिकाले  एक–एक लाखका दरले सहयोग गर्ने निर्णय गरेका छन् । अन्य पालिकाहरूले पनि सहयोगको प्रतिबद्धता जनाएका छन् । जिल्ला समन्वय समितिले  ५० हजार रुपैयाँ सहयोग गर्ने निर्णय गरेको छभने स्पार्क हाइड्रोपावर, पाथीभरा केबलकार र सानिमा मध्यतमोर हाइड्रोपावर लगायतका संस्थाबाट रकम उठ्न बाँकी रहेको आयोजकले जनाएको छ ।

खेल अवधिभर टिकट बिक्रीबाट  २३ लाख ७६ हजार ६ सय र विभिन्न सङ्घसंस्था तथा व्यक्तिबाट ३१ लाख ८७ हजार ५ सय २९ रुपैयाँ सङ्कलन गरिएको छ । त्यो रकमले प्रतियोगिताको पुरस्कार वितरण, खेलमैदान तयारी, स्टेज व्यवस्थापन, ट्रफी, मेडल, टिम व्यवस्थापन लगायत विभिन्न खर्च धानिएको छ ।

पूर्वखेलाडीहरूको सम्मान, रेफ्री र अफिसियल व्यवस्थापन, यातायात, मिडिया, मेडिकल, तथा खाजा खर्च लगायतका विभिन्न शीर्षकमा पनि उल्लेखनीय खर्च भएको छ । 

लाखेजात्रा सञ्चालन समितिले ५ लाख ८८ हजार ८ सय १० को अचल सम्पत्ति जोडेको छ र  १८ लाख ५० हजार बैङ्क खातामा राखेको छ । त्यसलाई आगामी योजनाका लागि सुरक्षित गरिएको कोषाध्यक्ष श्रेष्ठले बताउनुभयो ।