काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले प्रतिनिधिसभा निर्वाचनमा पराजित भएकाहरूलाई राष्ट्रियसभामा ल्याउन नहुने बताउनुभएको छ ।  

रास्वपा  सभापति  लामिछानेले मंगलबार प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा सत्ता गठबन्धनका केही दलले विभिन्न तहमा चुनाव हारेकाहरुलाई राष्ट्रियसभा सदस्यको उम्मेदवार बनाएर ‘व्यवस्थामाथि नै ठूलो ढुंगा प्रहार’ गरेको टिप्पणी गर्नुभएको हो । 

संवैधानिक परिषद् (काम, कर्तव्य, अधिकार र कार्यविधि) सम्बन्धि ऐन, २०६६ लाई संशोधन गर्न बनेको विधेयकमाथिको दफाबार छलफलमा रास्वपा  सभापति लामिछानेले राजनीतिमा यस्तो प्रवृति अन्त्य गनृुपर्ने उल्लेख गर्नुभयो ।  ‘तपाइँहरूले मुटुमाथि ढुंगा राखेर पार्टीको निर्णय मान्नुपर्ने अवस्था आएको छ नि । त्यसैगरी तपाईँको मुटुमा अर्को ढुंगा बस्छ । फेरि अर्को ढुंगा राखेर तपाईहरु हाँस्नुपर्ने अवस्था आउँछ’ बैठकमा उहाँले भन्नुभयो– ‘मलाई विश्वास छ(यहाँहरुको पुस्ताले लडेर हाम्रो पुस्ताले त्यो सौभाग्य प्राप्त गर्न सकेन व्यवस्था परिवर्तनका लागि । गोली थाप्ने, छाती थाप्न अगाडि बढन पाएन । मौका परे हामी पनि चुक्दैनौं । त्यसका लागि हामी पनि गोली थाप्छौं । तर, त्यसरी गोली थापेर ल्याएको व्यवस्थामा यत्रो उपहास भइरहँदाखेर व्यवस्थामाथि यत्रो आक्रमण भइरहँदाखेर यहाँहरूले गर्ने प्रतिवाद खोई त ?’