म्याग्दी । रोजगारीको सिलसिलामा कुवेतमा पुगेर चरम श्रम शोषणमा पर्नुभएकी महिलाको उद्धार भएको छ । कुवेतमाश्रम शोषणमा पर्नुभएकी बेनी नगरपालिका–९ घतान काउलेगौडाकी हिराकुमारी चोखालको उद्धार भएको हो। 

आकर्षक तलबको प्रलोभनमा परेर भारत हुँदै  कुवेत पुग्नुभएकी ३३ वर्षीया चोखालले श्रम शोषण भएको भन्दै आफूलाई उद्धारको लागि अनुरोध गर्नुभएको थियो ।  उहाँको अनरोधपछि म्याग्दी प्रवासी नेपाली सङ्घ मोना कुवेत, मोना अन्तरराष्ट्रिय, गैरआवासीय नेपाली सङ्घ .एनआरएनए)  कुवेत लगायत संघ, संसथाको पहलमा उद्धार गरिएको हो । 

कुवेतबाट नेपाल फर्कनुभएकी चोखाल बुधबार आफ्नो घरमा आइपुग्नुभएको छ । खाडीमुलुकमा शोषणमा परे पनि गुहार मागेर सकुशल घर फर्कन सफल हुनुभएकी चोखाललाई घरपरिवार र छिमेकीले फूलमाला लगाएर स्वागत गर्दै खुशी बाँडेका थिए ।  आठ महिनाअघि जटिल रोगबाट ग्रसित पति उपचार र छोराछोरीको शिक्षादीक्षाका लागि भारत हुँदै कुवेत पुगेकी चोखाल घरेलु काममा चरम शोषणमा पर्नुभएको थियो । 

हिराकुमारीले कुवेतमा दैनिक १८ घण्टासम्म काममा लगाउने र मानसिक तथा शारीरिक यातना दिने गरेको सुनाउनुभयो ।  समयमा पारिश्रमिक समेत नदिएपछि आफूले उद्धारको लागि अपिल गर्नुपरेको उहाँको भनाई छ ।