काठमाडौँ । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’  र पोलिटब्यूरो सदस्य खड्गबहादुर विश्वकर्मा ‘प्रकाण्ड’ सहित ४ नेताविरुद्ध पक्राउ पूर्जी जारी भएको छ । 
 
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री र वरिष्ठ उपाध्यक्ष नारायणकाजी श्रेष्ठ गृहमन्त्री भएकै बेला सशस्त्र द्वन्दकालका सहयात्री विप्लव’सहितका ४ नेतालाई काठमाडौँ जिल्ला अदालतले पक्राउ पुर्जी जारी गरेको हो ।  नेकपाका नेताहरुलाई सरकारले दर्ता गरेको राज्यविरुद्धको कसुरका दुई मुद्दामा  पक्राउ पुर्जी जारी गरिएको हो । विप्लव र प्रकाण्डसहितका नेताहरुलाई  ३५ दिनभित्र अदालतमा उपस्थित हुन भनिएको छ ।

काठमाडौँ अदालतले सोमबार गोरखापत्रमा प्रकाशन गरेको ३५ दिने सूचनामा नेकपाका महासचिव विप्लव, पोलिटब्यूरो सदस्य प्रकाण्ड माइला लामा, अखिल नेपाल किसान महासंघका अध्यक्ष राजु कार्कीको नाममा अदालतमा उपस्थित हुनका लागि आग्रह गरिएको छ ।

राज्यविरुद्धको कसुरको अर्को मुद्दामा माइला लामा र विप्लवविरुद्ध पक्राउ पुर्जी जारी भएको छ ।