सोलुखुम्बु । सोलुदुधकुण्ड नगरपालिका–७ का वडाध्यक्ष सोनाम ग्याल्जेन शेर्पाले व्यक्तिगत लगानीमा इन्टरनेट सेवा निशुल्क उपलब्ध गराउनुभएको छ । उहाँले आइतबारदेखि वडाको गार्मा जोरबौद्ध क्षेत्रमा वाइफाइ सेवा उपलब्ध गराउनुभएको हो । 

इन्टरनेटको बढ्दो महत्वलाई मध्यनजर गर्दै जोरबौद्धस्थित मुख्य सडक चोक क्षेत्रलाई फ्रि–वाइफाइ जोन घोषणा गरिएको वडासदस्य भलाकाजी कार्कीले जानकारी दिनुभयो । उहाँले भन्नुभयो– ‘जोरबौद्ध नगरपालिकाको व्यस्त सडक हो । सल्लेरी, नेले, सोताङ, महाकुलुङ तथा जिल्ला बाहिरका लागि सवारी साधन समेत यही सडक हुँदै जाने भएकाले वाइफाइ सेवा उपयोगी छ ।’ 

सडकमा यात्रु लामो समयसम्म सवारी साधन कुरेर बस्नुपर्ने तथा गाउँमा इन्टरनेट सेवा विस्तार भइनसकेको अवस्थामा वाइफाइ सेवाबाट लाभान्वित हुने वडाध्यक्ष शेर्पा बताउनुहुन्छ । उहाँले भन्नुभयो– ‘इन्टरनेटको सहज पहुँच भएपछि विद्यार्थी, अभिभावक, सुरक्षार्कीलगायत लाभान्वित हुन्छन् ।’ 

इन्टरनेट सेवा निशुल्क पाएसँगै स्थानीयले खुशी व्यक्त गरेका छन् । शुरुवातमा लाग्ने इन्टरनेट जडानखर्चसहित  वार्षिक रुपमा तिर्नुपर्ने इन्टरनेट खर्च  १२ हजार ५  सय रुपैयाँ वडाध्यक्ष शेर्पाले नै बेहोर्नुभएको हो ।