टीकापुर । टीकापुरलाई गुलाबको शहर बनाउने अभियान शुरु गरिएको छ । टीकापुरलाई गुलाबको शहर बनाउने अभियानलाई सहयोग पुगोस् भनी सुदूरपश्चिम प्रदेश सामाजिक विकास मन्त्रालय प्रादेशिक स्वास्थ्य प्रवर्द्धन केन्द्रले ५ लाख रुपैयाँ सहयोग हस्तान्तरण गरेको छ ।    

आज आयोजित कार्यक्रममा सुदूरपश्चिम प्रदेशका उद्योग पर्यटन वन तथा वातावरणमन्त्री लक्ष्मणकिशोर चौधरीले गुलाबको बिरुवा रोपेर अभियानको औपचारिक शुरुवात गर्नुभयो । 

उहाँले टीकापुरलाई गुलाबको शहर बनाउने अभियानको शुरुवात गर्नु मात्र ठूलो कुरा नभएको र त्यसलाई व्यवस्थित गर्नेतर्फ ध्यान दिन नगरपालिकालाई सुझाव दिनुभयो । ‘बजारमा गुलाब रोपेर सहरलाई सुन्दर बनाउने काम राम्रो हो’ उहाँले भन्नुभयो– ‘यस अभियानमा सबै नागरिकले सघाउनुपर्छ ।  मेरोे तर्फबाट पनि साथ र सहयोग रहने प्रतिबद्धता व्यक्त गर्दछु ।’

मन्त्री चौधरीले टीकापुर बजारलाई गुलाबको सहर बनाउँदै गर्दा टीकापुर पार्कलाई ओझेलमा पार्न नहुने बताउनुभयो । टीकापुरलाई गुलाबको शहर बनाउने अभियानलाई सहयोग पुगोस् भनी सुदूरपश्चिम प्रदेश सामाजिक विकास मन्त्रालय प्रादेशिक स्वास्थ्य प्रवर्द्धन केन्द्रले ५ लाख रुपैयाँ सहयोग हस्तान्तरण गरेको छ ।    

कार्यक्रममा प्रदेशसभा सदस्य ललिता सुनारले नगरपालिकाको अभियान राम्रो भएको र अभियान सफल पार्न आफूले सघाउने बताउनुभयो । सिद्धार्थ ग्रुपका प्रमुख कार्यकारी अधिकृत (सीइओ) कृष्णप्रसाद न्यौपानेले आफूले गुलाबको बगैँचासहितको गुलाबको शहर कतै नदेखेको बताउनुभयो । ‘यो नै विश्वको गुलाबको पहिलो शहर हुनेछ’ उहाँले भन्नुभयो– ‘यसलाई पर्यटकीय हिसाबले पनि विकास गर्न सकिन्छ ।’

नगरप्रमुख रामलाल डंगौरा थारूले टीकापुरलाई गुलाबको शहर बनाउने अभियानमा टीकापुर नगरपालिकाको पैसा खर्च नगरेरै श्रमदान तथा अरूको सहयोगबाट गुलाब रोप्न लागेको र त्यसमा सहयोग गर्न सबैलाई अपिल गर्नुभएको छ । पहिलो दिन टीकापुर नगरपालिकाको प्राङ्गणमा र खडक चोकदेखि जमरा पुलबीचको भागमा गुलाबका बिरुवा रोपिएका छन् । 

गुलाब रोप्ने अभिायनमा विभिन्न विद्यालय र समुदायले श्रमदान गरेका छन् ।