काठमाडौँ । सरकारले लेखा समूहका एकैपटक ५ सय ८ जना कर्मचारीको सरुवा गरेको छ ।  महालेखा नियन्त्रक कार्यालयले बिहीबार लेखा समूहका ५ सय ८ जना कर्मचारीको एकैपटक सरुवा गरेको हो  ।

महालेखा नियन्त्रक कार्यालयले ३४ जना उपसचिव (प्रमुख कोष नियन्त्रक र उप–महालेखा नियन्त्रक)  १२२ शाखा अधिकृत (लेखा अधिकृत  र कोष नियन्त्रक) र ३५२ जना नायब सुब्बा (लेखापाल)को सरुवा गरेको हो । महालेखाले कार्य प्रकृति, कार्यबोझ, भौगोलिक क्षेत्र, कार्य सञ्चालन, कोष सञ्चालन एवम् व्यवस्थापन, आन्तरिक लेखा परीक्षण केन्द्रीय लेखा सम्बन्धी अनुभव समेत दिलाउने उद्देश्यले सरुवा गरिएको कार्यालयले जनाएको छ । 

महालेखा नियन्त्रक कार्यालय यसअघि गएको वैशाखमा लेखा समूहका ६ जना उपसचिव र ४४ शाखा अधिकृतको सरुवा गरेको थियो । महालेखाले सरुवा तथा काज व्यवस्थापन मापदण्डका आधारमा कर्मचारीको सरुवा हुने व्यवस्था गरेको छ । लेखा अन्तरगत करिब ४ हजार कर्मचारी कार्यरत छन् ।